durchstart Goes Bern

Bärn isch nid nur bekannt fürä schön Dialäkt, nei weme a Bärn dänkt, denn chunnt eim o d’Aare z’Sinn, z’Bundeshuus und vilech sogar no dr Bäregrabe.

Mir vo durchstart dänke öfters o a Bärn, nid nur wüus so schön isch, sondern wüu mir einersits o immer mindeschtens ei Mitarbeiter:in im Team hei, wo vo Bärn chunnt und wüu Bärn u Züri, entgäge de gängige Stereotype und provokative Kantönligeischtressentiments de doch o viu gmeinsam hei.

Äs Arbeitsintegrations-Programm wie durchstart gits auerdings z’Bärn nid. Es git natürlech einigi Abieter i däm Beriich, aber die Projektorientierti Programmstruktur wie mir se z’Züri hei, die fäuht z’Bärn no. Finge jedefaus mir. Mir säge si fäuht, wüu mir z’Gfüehl, dr Iidruck u d’Erfahrig hei u mache, dass mir mit üsne Asätz u Methodene dört asetze, wo sich vili jungi Mönsche abghout füehle; bi ihrne Ressourcene, Stärkine und Inträsse. Nid z’säge das machi nid o Anderi, aber z’säge dasses Anderi nid so mache wie mirs mache; über d’Projektlandschaft.

Auso hei mir vor guet zwöi Jahr drmit agfange, z’Bärn mit Lüt us üsere Branche ga z’rede. Ga z’rede um usezfinge, ob durchstart de junge Mönsche in Bärn auefaus öppis cha biete, wos so no nid git i dr kantonale Integrationslandschaft.

I dene zwöi Jahr isch viu passiert, mir hei viu glehrt und viu erfahre und üs ungerwägs entschide, dass mir e Zweigschteu z’Bärn wei eröffne. Quasi ä Ableger vo durchstart, mit de glichige Idee vo Integrationsarbeit, de gliche Hautige und Prozässe drvor, aber de doch nid ä Klon, sondern ä eigeständigi Niderlassig miteme Bärner Team und ere Bärner Kultur. Was natürlech o nid heisst, dass z’Team Bärn villech nid o immer mindischtens ein Mitarbeiter:in im Team het, wo vo Züri chunnt. Wär weiss.

Durchstart Bärn söu im Herbscht das Jahr dürestarte. U mir si aui optimistisch u überzügt, dass z’Programm die bishärige Abieter nid konkurrenziert, sondern ergänzt u somit über d’Projektlandschaft junge Mönsche ä neui Heragehenswiis cha biete, ihres eigene Potenziau, ihri Ressource und müglechi Usbildigsperspektive z erkenne.

Mir hoffe, a dere Schteu glii, villech de wider in Schriftdütsch, dermits o aui eifach läse chöi, meh Infos chönne z’gäh, wenn, wo, wie und mit wäm Bärn dä Herbscht losleit.

Bis dört häre,

Liebi Grüess us Züri nach Bärn

Mir fröie üs uf di!